Pasok sa 2025 National Gawad Saka
Kinilala ang Catanduanes bilang Top 1 Kadiwa ng Pangulo (KNP) Implementor sa Bicol Region sa Regional Gawad Saka 2025, dahilan upang ito ay awtomatikong maging kwalipikado para sa parehong kategorya sa 2025 National Gawad Saka Awards.
Inanunsyo ito noong Marso 20 sa isang pagpupulong ng Provincial Agricultural Services Office (PASO) sa Provincial Multipurpose Training Center, kung saan tinalakay rin ang mga estratehiya upang higit pang mapalakas ang pagpapatupad ng KNP sa lalawigan.
Bukod sa naturang parangal, kinilala rin ang Catanduanes bilang may pinakamaraming Kadiwa ng Pangulo na isinagawa sa antas panlalawigan mula Enero hanggang Abril 2024—isang pagkilalang natanggap ng lalawigan noong Mayo ng nakaraang taon.
Sa inilabas na ulat ng PASO, umabot sa P322,157 ang naitalang kita ng KNP mula Pebrero hanggang Marso 19, 2025, na nagpapakita ng patuloy na tagumpay ng programa sa pagbibigay ng direktang merkado para sa mga lokal na magsasaka at mangingisda.
Upang mapanatili ang tagumpay ng KNP, target ng PASO na palawakin pa ang partisipasyon ng mga magsasaka at mangingisda, kasabay ng pagpapatibay ng farm-to-table system na layong mapalakas ang lokal na agrikultura at ekonomiya.
Samantala, isang Kadiwa ng Pangulo ang itinakdang ganapin sa Marso 25-26 sa Provincial Capitol Grounds mula 8 AM hanggang 5 PM, kung saan hinihikayat ang publiko na suportahan ang mga lokal na produkto at kabuhayan.
Dinaluhan ang pagpupulong ng mga kinatawan mula sa Department of Agriculture (DA), Department of Trade and Industry (DTI), Bureau of Fisheries and Aquatic Resources (BFAR), National Food Authority (NFA), at iba pang ahensya, kasama ang mga Rural Improvement Clubs, na nagpapatibay sa sama-samang pagtutulungan para sa ikauunlad ng KNP sa lalawigan.
