SAN MARCELINO, Zambales — Pormal nang sinimulan ng Kagawaran ng Pagsasaka para sa Gitnang Luzon (DA-RFO III) ang pagtatayo ng Agribusiness Incubation (ABI) Center matapos isagawa ang groundbreaking ceremony noong ika-1 ng Oktubre, sa DA-Research Outreach Station for Lahar-Laden Development (DA-RSLL), Brgy. Rabanes, San Marcelino, Zambales.
Ang naturang pasilidad ay bahagi ng inisyatibang “Development of a Community-Based Agribusiness to Improve the Livelihood and Income of Marginal Farmers in Central Luzon,” na pinondohan sa pamamagitan ng US$6 milyong grant ng Korea International Cooperation Agency (KOICA) at ipatutupad katuwang ang DA-RFO III mula 2025 hanggang 2029.
Layunin nitong palakasin ang kapasidad ng mga maliliit na magsasaka at samahang pansakahan sa rehiyon upang makapagtatag ng mga napapanatili at tumutugon sa merkado na mga negosyong agrikultural.
Magsisilbi ang ABI Center bilang incubator na gagabay sa mga magsasaka sa pagbuo at pagpapalago ng kanilang mga negosyo sa pamamagitan ng pagbibigay ng shared office spaces, pasilidad sa pagpoproseso, pagsasanay, mentorship, at tulay sa mga mapagkukunan ng pondo at mamimili. Bukod dito, magiging sentro rin ito ng pagbabahagi ng teknolohiya at karanasan mula sa South Korea na iaangkop sa lokal na pangangailangan ng Gitnang Luzon.
Ipinunto naman ni DA Assistant Secretary for Agribusiness, Marketing, and Consumer Affairs Atty. Genevieve E. Velicaria-Guevarra na magsisilbing daan ang ABI Center upang lagyan ng karagdagang halaga o value-adding ang mga ani sa Zambales.
“I believe that the establishment of this Agribusiness Incubation Center is especially meaningful because it responds to one of the most important challenges facing our agricultural sector today, and that is: How do we help our farmers move beyong production and become successful entrepreneurs? They need an environment where they can develop their ideas, learn from others, and turn promising agricultural ventures into successful and sustainable businesses.” aniya.
Pahayag naman ni KOICA Country Director Jung Youngsun “Through our partnership with the Philippines, the Government of the Republic of Korea, through KOICA, hopes to contribute to a more profuctive and competitive agricultural sector by empowering Filipino farmers to develop sustainable anfribusiness, increase their incomes, and build stronger rural communities.”
Dagdag pa ni Jung, nais nilang bigyang kapangyarihan ang mga magsasakang Pilipino upang makapagtayo ng sariling agribusiness at maitaguyod ang mas matatag na mga komunidad sa kanayunan.
Pinangunahan ang delegasyon ng DA nina Assistant Secretary Velicaria-Guevarra, DA-RFO III Regional Executive Director Dr. Eduardo L. Lapuz Jr., Regional Technical Director Arthur D. Dayrit, Regional Technical Director Elma S. Mananes, Project Leader Josephine J. Muñoz, at Station Chief Engr. Matthew Mark C. Capillo.
Bilang kinatawan ng KOICA, dumalo sa seremonya sina Country Director Jung Youngsun, Assistant Country Director Pyun Eunhye, Project Manager Yim Soungbin, Assistant Program Manager Leny Amparo, at Program Officer Kim Gabin.
Nakiisa rin sa pagtitipon sina San Marcelino Mayor Hon. Elvis R. Soria, Provincial Agriculturist Arnel V. Abayan, Municipal Agriculturist Remin P. Sorda, at ang kanilang mga agricultural extension workers.
