SAN GABRIEL, La Union – Muling pinagtibay ng Provincial Government of La Union at ng Local Government Unit (LGU) ng San Gabriel ang kanilang adhikain para sa agricultural development sa pamamagitan ng isang ceremonial signing ng Deed of Usufruct sa San Gabriel Municipal Hall, noong July 10.

Pinangunahan nina Governor Mario Eduardo C. Ortega at San Gabriel Mayor Lany B. Carbonell ang seremonya. Dumalo rin sina Ex-Officio Board Member Ramon Guio “Ram” A. Ortega, San Gabriel Vice Mayor Ramolito A. Guinomma, Provincial General Services Officer Engr. Robert Lelina, Provincial Agriculturist Marcelo Otanes, sangguniang bayan members, at mga municipal department head.

Ipinagkaloob ng PGLU sa LGU San Gabriel ang 1,613.43 square meters na bahagi ng provincial property sa Brgy. Bucao, San Gabriel, La Union kung saan maipatatayo ang San Gabriel Farmers Trading Center na magsisilbing sentro ng kalakalan para sa mga produktong agrikultural.

Magsisilbi ang proyekto bilang pangunahing trading hub kung saan mapapabilis ang produksyon at benta ng mga magsasaka na dagdag sa kanilang kita. Sumasalamin ito sa pagtutulungan ng probinsya at mga LGU para sa local development sa sektor ng agrikultura.