Tinatayang mahigit 3,000 pamilya mula sa mga bayan ng San Miguel at Caramoran ang muling nakatanggap ng 10-kilong NFA rice noong Enero 24, 2025, bilang bahagi ng programang early recovery efforts ng Pamahalaang Panlalawigan ng Catanduanes.

Sa ilalim ng nasabing hakbang, 2,197 pamilya mula sa pitong barangay ng Caramoran at 974 pamilya mula sa apat na barangay ng San Miguel ang nakinabang mula sa pamamahagi ng bigas.

Ayon sa lokal na pamahalaan, isang araw bago ito, namahagi rin sila ng parehong halaga ng bigas sa bayan ng Panganiban bilang bahagi ng patuloy na programa ng tulong sa mga naapektuhan ng kalamidad.

Ang nasabing early recovery response ay inaasahang magpapatuloy sa mga susunod na araw upang matulungan ang mga pamilyang labis na apektado ng mga kalamidad at mapabilis ang kanilang pagbangon. (Catanduanes PIO)